新車速報：<br>現代Matrix韓風襲港

新車速報：
現代Matrix韓風襲港

韓國現代汽車重新打入香港市場，新代理對前景充滿信心，重率先引入一款走家庭RV路線嘅Matrix抵港；同樣以五門掀背包裝嘅Matrix，個子高大吸引，加上一台較傳統1.5公升偈更富動感嘅1.8公升引擎配搭，以唔到11萬嘅車價，開拓另類家庭車市場，委實百利而無一害㗎！
記者、攝影：陳偉林

■車身兩旁刻有賓利法連拿嘅名字，系出名門不言而喻。

近年RV熱潮興起，唔少車廠響小車跟家庭車之間，開闢另類家庭RV市場，當中尤以日本車廠最為看重，難得靠近東瀛嘅韓國現代汽車，亦具備市場觸覺，響Getz車系中開發變種嘅Matrix型號，惹來車迷注目。

■車廂鋪排迎合汽車潮流，予人時尚活潑感。

後排

前排
■前後兩排以高級仿皮包裝，坐得貼服之餘，重有頭枕配搭。

■一體式中控台陳設，有齊冷氣及音響外，重有隱蔽式雜物匣。

名家手筆外形好吸引
看上去，呢部出自意大利賓利法連拿設計室手筆嘅Matrix，跟同廠Getz極為相似，惟前者具有一個高聳闊大嘅車廂，別有一番RV味道。
流麗外形匹配時尚車頭設計，又有望落頗具神氣嘅車燈及霧燈組合，加埋原廠尾定翼連High-mount煞車燈，真係好吸引噃！

■遇有需要時，可將尾排收摺起，令尾廂空間感倍增。

■前排椅背後設有活動桌几，好切合RV用途。

座艙闊落尾排多變
車廂兩排五座位設計，用上仿真皮配搭，格調高級豪邁，而兩排之間重有Walk-through嘅方便㖭！再者，後排座椅更可以獨立收摺，令尾廂空間倍增㗎！
設備方面，既有齊電窗、門邊電鏡及電天窗外，還有原廠冷氣跟音響組合，而前排椅背重附有活動桌几，實用性不言而喻。





1.8公升偈暢順有力
新代理引進全新Matrix，配用一台1.8公升偈跟4前速自動波，明顯起跑加速有力，而歐式底盤配搭穩紮吸震力度軟硬適中，走彎循迹性亦見不俗，用嚟日常代步或搬運多件行李時，都好切合需要㗎！

■電天窗前後各設有獨立房燈，兩旁重有扶手組合。

■駕駛席一旁門壁以人體工學設計，有齊電窗開關鍵。

■打破傳統韓國車嘅鬼面罩設計，更能融合汽車潮流。

■高置尾定翼連High-mount煞車燈，有多一份活力感。

■防雨滴門邊鏡匹配原廠車頂行李架，外觀吸引又實用。

■波箱置於中控台下方，有利車廂營造Walk-through方便。

■中置表板及軚盤前置警示燈號編排，可讓駕駛者更能集中精神。

現代Matrix1.8規格
引擎：1795cc直4DOHC
馬力：126ps/6000rpm
扭力：16.5kgm/4500rpm
傳動：4前速自動波，前輪驅動
懸掛：（前）柱式獨立（後）扭力連桿
制動：（前）透氣碟（後）鼓式（ABS）
輪胎：205/55R15　HankookOptimoK406
尺碼：4025×1740×1685mm
軸距：2600mm
車重：1120kg起
極速：170km/h
車輛提供：現代香港
電話：
28957312（11月28日前）
34288288（11月28日後）

■新車用上一台輸出強勁嘅1.8公升直4偈，加上歐式底盤結構，有不錯操控感。

記者評語：闊落車廂好實用
新車走RV路線，特別配搭有高聳車廂，令乘客坐得格外舒適之餘，兩排之間既有Walk-through方便，而將尾排收摺起，重騰出好闊落嘅車廂空間；配用一台1.8公升引擎，起跑加速表現好力又暢順。雖然牌費支出稍高，但以唔到11萬嘅車價便可擁有，倒有一定號召力。

■新款Matrix可算係同廠Getz嘅變種，針對唔同客路各展所長。

同級對手比較
豐田CorollaVerso
引擎：1794cc直4DOHC
馬力：135ps/6000rpm
扭力：17.3kgm/4200rpm
尺碼：4240×1695×1610mm
軸距：2600mm；車重：1210kg
新車售價：$169,000
查詢：皇冠汽車（28661020）
評語：有別傳統家庭車嘅五座位RV設計，坐得格外闊落之餘，設備講究又吸引，尾廂重好實用㖭！