美國Nu-Metal樂隊Korn，早排唱過《盜墓者羅拉：生命之匙》嘅主題曲，重喺MV入面同安琪蓮娜祖莉（AngelinaJolie）合唱。最近Korn推出新碟《TakeALookInTheMirror》，佢哋首主打歌《RightNow》嘅MV雖然係卡通片，但由於充斥自虐嘅畫面，所以喺本地禁播。
Korn個MV利用卡通片去表達佢哋充滿自虐嘅意念，非常惡心。個卡通人物喺MV入面挖鼻哥同肛門都未算核凸，佢重㩒爆身上嘅毒瘤、赤腳踩釘、用牙刷撩鼻、用鉸剪剪眼皮，甚至自𠝹手指，最激都係用門綁住條繩剝牙，最後連頭骨都扯埋出嚟。
其實Korn舊年嗰首來自大碟《Untouchables》嘅《HeretoStay》，個MV入面因為有動物性交同血淋淋嘅心臟手術等片段，喺新加坡、馬來西亞同香港禁播。而Korn早排接受音樂網頁訪問時，提到明年二月會舉行世界巡迴音樂會，香港亦會係其中一站，相信到時本地嘅Korn迷一定會玩到喪晒。