雖然親中喉舌狂呼二○○七年普選特首係「癡人說夢」，民建聯喺區選中遭逢慘敗，喺北角錦屏選區險勝「長毛」嘅蔡素玉，噚日出席城大一個「立法會應否於二○○八年全民普選」論壇時，竟然就死撐話民建聯嘅黨綱列明，一直支持喺○七年支持普選行政長官同○八年直選立法會，而點做法重可以坐低嚟傾。
佢嘅言論即時惹嚟其他講者圍攻，民主黨單仲偕就話，幾個禮拜前民建聯立法會有關普選議案嘅辯論中投棄權票，𠵱家又話一直支持普選。佢即席邀請蔡素玉同民建聯盡快喺立法會提出要求普選嘅議案，民主黨一定全力支持。至於蔡素玉有冇答應，唔使問都知係冇啦。
另一方面，蔡素玉上次出選立法會時嘅拍檔程介南，噚日出席一個公開活動時提到佢死黨曾鈺成辭職一事，佢話知道佢會辭職已經好耐，區選失利係咪曾主席辭職嘅藉口，真係佢自己至知。佢又親口證實已經同一直支持佢嘅女友張專拉埋天窗。
傳真︰2623-9278
電郵︰