曾健成亞牛以一千四百八十一票打低三名對手，當上了港島東區樂康區議員，八方真係要恭喜佢，因為佢嘅對手好惡，有民建聯現任議員陳達強讓位畀佢阿姐去馬嘅女大律師湯棋淯，以及做保險嘅黎必勝。亞牛今次跑贏，肯定同7.1有關。
八方問亞牛心情點？佢話咪好感動囉。上次參選俾人抹黑，輸二百票，之後佢堅持留喺呢區工作，結果今次選舉出現咗曙光同明天。牛嫂梗係為老公高興，亞牛已經打長途電話向兩個喺美國讀書嘅乖仔報喜。
亞牛首要多謝啲街坊，請假病重嘅都嚟投票，投票率有成四成六，擊敗了民建聯嘅千二鐵票；第二個要多謝嘅係梁家傑同余若薇嘅支持，否則點夠位大律師兼羽毛球總會會長湯恩佳千金湯小姐鬥；最後梗係要多謝董建華呢個最大助選團，冇佢日日搞埋啲王見秋事件，啲選民點會咁下決心，一定要掃走保皇黨。
傳真︰2623-9278
電郵︰