新車速報1：<br>日產Elgrand「銀影版」展現獨特個性

新車速報1：
日產Elgrand「銀影版」展現獨特個性

唔少車迷追求出眾嘅乘坐感，響芸芸豪華MPV中，日產Elgrand好評不絕，既提供有多達七座位配搭，實用多變嘅座椅編排，加上講究嘅設備同引擎演繹，更教人留下深刻印象。而新加入嘅「銀影版」裝備（需多付$18,000），進一步提升Elgrand嘅外在美，益發展現其趨時嘅吸引魅力。

記者、攝影：陳偉林　ImageGirl：Cody
新車售價：$449,700（標準版）
車輛提供：合誠汽車（28035333）

豪華舒適嘅MPV，唔止要有出眾配套設備，還需要有一個突出嘅造型作招徠；而日產Elgrand經歷兩代，愈變愈有個性，令一眾Fans難於抗拒呢！

加裝設備倍見吸引
方匣子嘅造型，幾乎已給MPV定型，惟有心思嘅設計師，往往懂得響有限空間中玩變化。
而日產新款Elgrand可會是箇中嘅表表者，造型夠突出之外，代理新加入嘅「銀影版」配套設備，還教人有時尚及前衞嘅High-tech感㖭！

■座艙陳設豪邁有品味，亦見有一份獨特性。

真皮座椅愜意舒適
講到車廂，Elgrand三排七座位真皮配套，軟滑貼服之餘，又見有出眾承托感；難得中、後排重可以放平成敞大卧鋪，若有需要後排重可以左右收摺起，令尾廂容量倍增。
除車廂設備講究豪邁之餘，新車嘅低地台設計、加上左右雙趟門及左邊全自動開關裝置，重予人好大方便呢！



3.5V6偈可靠寧靜
新車用上一台日產有名嘅VQ系列，3.5公升V6偈配搭，加埋一套5前速半自動波，更附有Sport同Snow模式選擇，令起跑加速表現有力外，重帶出多一份駕駛樂趣。
再者，柔韌有力嘅懸掛設計，有出眾循迹演繹之餘，四輪碟煞加上ABS連EBD裝置，重予人收放自如之感㗎！


「銀影版」配套逐樣捉

■前後三排座椅皆以高級真皮鑲嵌而成，承托力甚豐，加上後排可左右收摺起，以增加尾廂載物容量。

■後排旁備有窗簾及隱蔽式杯座連雜物匣，享受至高。

1左右車身金屬門枕

2車尾冚電鍍裝飾

3直立式電鍍尾燈外框



以上「銀影版」配件售價：$18,000
（註：連人工及稅款）

4車頭燈之間電鍍橫眉

5電鍍門邊鏡殼連方向指揮燈

■將座椅覆摺放平，可營造出敞大嘅卧鋪。

■左右雙趟門設計，除方便乘客上落外，其中左邊一度車門更可作全自動開關。

■中控台有齊高級音響及恒溫冷氣，可謂一應俱全。

■半皮半桃木軚環，附有定速巡航等設備嘅遙控鍵。

■一套5前速半自動波，能予人操控手波車嘅快感。

記者評語：樣靚坐得舒適
新加入「銀影版」裝飾，令造型倍見個性獨特一面；3.5公升V6偈表現寧靜，可靠又有力，柔韌嘅懸掛配搭，重為乘客提供有出眾嘅乘坐感。

■表板鋪排簡潔，資料豐富又易讀。

Cody評語：車廂鋪排實用
呢部日產Elgrand份量十足又有型，車身電鍍裝飾閃爍生輝又吸引，最大賣點重係三排軟滑貼服嘅真皮座椅，重提供有一份多變嘅實用性㖭！

日產Elgrand「銀影版」規格
引擎：3498ccV6DOHC
馬力：240ps/6000rpm
扭力：36.0kgm/3200rpm
傳動：5前速半自動波，後輪驅動
懸掛：（前）柱式獨立（後）多連桿
制動：（前）透氣碟（後）碟式（ABS）
輪胎：215/65R16
尺碼：4795×1795×1920mm
軸距：2950mm
車重：2010kg
平均耗油：8.2km/L

■新車以一台3.5公升V6偈作配搭，好力慳油之餘，又見有運轉寧靜嘅特性。