曼聯喺今晚歐冠盃雖然要對彭拿典奈高斯，但佢班球員就當對手冇到，賽前提都冇提過該支希臘球隊啲嘢，猛咁講禮拜日作客對車路士嗰場英超聯大戰。
咁又係，彭隊四場先得嗰一分，而且喺首循環重吞咗曼聯五隻蛋，實力有幾多心照啦！但車仔就唔同，自油王阿巴莫域治入主後，招攬咗好多好手加盟，計有梅度、基斯普、杜夫同華朗等，實力亦強咗好多；而𠵱家佢哋喺超聯重愈戰愈勇，直接威脅到曼聯喺超聯嘅王者地位。咁都未算，車仔重唔畀面到撬走曼聯嘅老總簡安，搞到曼聯班高層不知幾火滾，話到明會喺禮拜日要車仔本利歸還。
車仔𠵱家唔止係曼聯嘅爭標大敵，兼且重做埋佢哋仇人，呢場波咁重要，唔怪得曼聯班球員「身在希臘」，但「心在倫敦」啦！
過去幾個月提親巴西國腳洛基祖利亞都係負面嘢，佢響歐冠盃決賽拉傷、被AC棄用以至喺列斯成日俾人鬧係敗家仔。最近佢踢完兩場世界盃外圍賽後又整傷足腱，要唞超過一個月。好多人都話列斯無呢件災星壓陣重好，但隊波唔夠兵又係事實，佢養傷對列斯真係福禍難料。
幫拉脫維亞打入歐洲國家盃決賽周嘅前鋒華柏高斯基，據聞去阿仙奴試腳，巴塞亦加入戰團搶貨。我求大俠提醒佢，佢嘅同胞史彭洛夫斯喺兵工廠就好失意，重借咗畀比甲比華倫，而阿仙奴前線係法國幫玩晒，過到去隨時唔受你玩，到時做第二個拉脫維亞人球就無謂啦。
英格蘭國家欖球隊捧走世界盃後，隊波人氣急升，其中韋健遜好似碧咸咁受歡迎，故有人話欖球隨時取代足球成英格蘭頭號運動。但我求大俠認為，欖球冇足球咁普及，另英國佬成日自認足球由佢哋發明，故就算英格蘭球會同國家隊成日幾令人失望，足球重係最受歡迎。
小馬老闆古賓喺季前決心要羅致莫寧，點知畀網隊截胡，激到古老闆生蝦咁跳，佢當時自我安慰話就算簽到莫寧都未必喺好事，因為佢嘅腎病可能隨時復發，到時唔單止血本無歸，重會搞衰隊波㖭。「塞翁失馬，焉知非福」，相信古老闆𠵱家慶幸緊自己逃過一劫！