年尾流流，果然又係工業股嘅世界，好幾隻工業股臨近出業績，都獲得外資行出報告唱好，預測業績正斗。其中即將公布中期業績的震雄集團（057），噚日就獲多間外資大行垂青，話可以留意買入。
至於震雄業績有幾正？經紀黃就話留番畀分析員介紹，佢就純粹以股權分布嚟睇，由於大部份街貨由幾個基金坐晒，所以容易炒供求。
震雄大股東在8月份，曾以每股3.975元減持過一批股份，但好快就落入芬佬手上，股價拾級而上，就算期間有個別芬佬減持，但旋即有另一批芬佬接貨，雖然有啲兜兜轉轉，但震雄仍然保持基金股地位，股價亦繼續硬淨。震雄噚日升1％，收4.80元。
另外一隻工業股毅力工業（332），情況同震雄近似，將在12月1日公布中期業績．毅力噚日表現就更搶鏡，升5.9%％，收3.125元，創52周新高。
毅力噚日成交1161萬股，其中有一手392萬股造2.945元的大成交上板，據講係有芬佬要貨。
慕容小初