十一月二十三日區議會選舉，投票人數超過一百萬人，投票率突破四成，創歷史新高，確實振奮人心，明年立法會選舉，定必空前激烈，支持民主選舉嘅市民，到時必須空群而出。
經紀S居於火炭多年，歷年都有投票，次次都係去銀禧花園商場頂樓嘅一間幼稚園投票，喺星期日中午飲茶之前，叫老婆一齊去投票，老婆話：「去邊度投票呀？」經紀S話：「咪銀禧花園囉！」點知拆開投票通知書一睇，先知道係去體育學院，冇所謂啦，橫掂都係揸車去啫，於是去到投票站，人丁單薄，唔夠幾分鐘就行番出嚟，預備揸車鬆人。咦，有一位老婆婆戙住支枴杖大嗌：「先生，你去邊呀，車我返上銀禧花園得唔得？」經紀S老婆即刻喝停經紀S，問：「阿婆，有乜事呀？」婆婆話：「我坐咗一架參選人嘅穿梭小巴落嚟投票，點知唔記得帶身份證，要返轉頭，但係小巴走咗，的士又冇，唔該你車番我上去吖。」經紀S覺得冇問題，於是兜咗去火炭銀禧花園，婆婆多謝而去。
經紀S諗諗吓，覺得移走投票站，非常唔方便一般市民，銀禧花園有大量選民，有小巴巴士的士經過，交通方便，但體育學院就冇公共交通工具到達，有的士入，冇的士出，行出去划艇中心，有幾百公尺咁遠，你叫啲長者選民點搞？
咁嘅選舉安排簡直係扼殺投票意欲降低投票率，中間有冇陰謀呀？胡國興法官應該查核一下，點解唔keep住火炭投票站喺銀禧花園或搬去火炭火車站？