近排城中熱門話題除咗元朗條鱷魚，同埋區議會選舉外，相信都離唔開飛機師。皆因某大電視台近排喺黃金時段播放緊嘅「人氣」電視劇，內容正正係講飛機師同埋航空界嘅故事。
永泰亞洲就食住呢個「人氣」劇集，今日喺尖沙嘴漾日居搞記者會，唔知係咪個樓盤喺正機鐵九龍站上蓋，同機場都拉到啲關係，邀請函上面開宗明義寫話，記者會主題係「PilotSuite」隆重登場，且會有啟航儀式。
主持呢個登機儀式嘅，當然係賣樓話事人李簡鳳玲，佢會化身成為頭等俏佳人。平時，李太見傳媒，都好少有咁嘅造型。聽聞，大會重請到劇集裏面嘅男主角做嘉賓，擔任飛機師，駕駛呢個頭等艙。
自由行魔力驚人，內地旅客最愛嘅消費品莫過如珠寶、鐘表同影音等，旺區內相關嘅店舖亦愈開愈多，其中商人楊受成旗下英皇鐘表珠寶集團，睇好自由行商機，積極擴張經營，經過多月洽商，終擊敗其他對手，以每月四十三萬，租下銅鑼灣羅素街五十九至六十一號地下舖王。
據做成呢單生意嘅喜來登旺舖代理執行董事譚嘉生講，今次英皇鐘表珠寶集團，簽咗五年租約，租金同舊租約差唔多，以實用面積七百呎計，每呎租金六百一十四元。上址業主去年以七千七百萬買入，租金回報率六厘七。
新地觀塘創紀之城五期APM，三至五樓，二萬一千方呎，已定命Xsite，專賣年輕人嘅潮流產品。
呢個場由國際著名建築設計公司Benoy設計，靈感就來自燈籠，重運用嶄新的建築技術，製造懸浮半空嘅視覺效果。
新地代理工程管理部高級策劃經理朱國傑介紹，呢幾層樓面最特別嘅地方，全部商舖均冇間隔，而且租期特短，只需要兩周以上就可以，地板唔鋪雲石，改用一啲可以一晚換新裝嘅物料，例如木板咁。
短時間內換新裝，可以不斷為商場帶嚟新鮮感，消費者每次行街都可以有新發現。
商場如戰場，為咗要擊敗對手，美聯借用孫子兵法作為內聯網嘅教材，將其中13篇嘅精粹，剖釋乜嘢係謀略部署，內容提到甚麼五事「道、天、地、將、法」之本，「將」中有「智、信、仁、勇、嚴」等，用嚟解釋「有備無患」、「目標為本」及「知人善用」嘅大義。
另外，美聯亦會邀請對孫子兵法有研究嘅專家舉辦講座，務求令員工更懂得策略智謀，體會團隊精神。
就到聖誕，大小商場都準備聖誕裝飾嚟迎接普天同慶節日，聖誕樹自然唔少得。
恒基地產今年花費一百萬元粉飾馬鞍山新港城中心，場內將會有一株二十呎高嘅立體舞台聖誕樹，叫做「立體SING」聖誕樹。棵樹有六層高，搭有台階，可以容納二十人喺樹上唱歌。
聽講，呢棵樹嘅設計係源自美國肯塔基一間教堂嘅聖誕樹，搭建工程將會喺今個禮拜尾完成，下月中就可以開放畀公眾參觀。到時重會請嚟唔少歌詠團同人氣歌手獻唱，洋溢一片聖誕歡樂。
蘭西
電郵地址：
