七一精神繼續發功，區議會選舉餘波未了，民主派要求取消區議會委任議席。
民建聯雖然重創，但仍有委任議席可以開後門。雖然，喺區議會選舉歷史上，好似未試過委任直選嘅落敗人士，不過，喺特區年代，喺人類史上未曾試過嘅嘢，冇人敢包呢個政府一定唔會試，所以民建聯議員就算直選落敗，可以透過委任嘅後門倒轉頭入番，呢一樣，係政府「行政主導」嘅權力範圍，吹咩？
何況，政府可以聲大大咁話：就算委任番葉國謙做區議員，葉國謙點都有一千幾票選民支持，如果委任鄔維庸，就只係得阿董一票，咁係一千幾票「民主」，定係委任嗰一票「民主」？
若果拗到咁，又有古講：若然係直選落敗嘅都可以委任，咁就要按「比例代表制」精神委任，即是委任葉國謙，得，不過同時又要委任埋長毛梁國雄。最後，盞咪又嘈到上國家嘅層面，由阿爺定奪，即是曾慶紅話事：葉國謙得，長毛唔得；或者兩個都得，不過要同時搭多件鄔維庸。嗰陣時，咪盞又谷多一鑊五十萬人大遊行？
區議會根本就係一個政治組織，點止淨係通坑渠？一九八二年香港第一次實行區議會選舉，係前港督麥理浩知道大陸準備收番香港，配合戴卓爾夫人上北京談判香港主權問題而產生。冇香港前途問題，就冇區議會選舉，到咗今日，政黨靠區議會攝位，培養問政新血，區議會係小學，立法會係中學，一條龍食住上。有政黨參與嘅選舉，就會政治化，最上嗰層，香港人選唔到特首、司局級高官，就梗係焗住香港人喺下層開拓民主空間，瘦上肥下，委任制有乜理由再繼續？
區議會議員，全部委任得唔得？冇話唔得，只要特首由普選產生，得到市民授權，咁特首委任晒四百個區議會議員，包括姨媽、叔仔、大姑奶、專門掃街通渠、掃黃捉雞，都冇所謂。若然工作不力，不過特首就要上埋身，問埋責，到咗下次普選，呢四百個特首掃街通渠御林軍，就陀衰埋個老細。
呢個政府完全重未知現時呢個死局癥結何在，重係俾班土共，加埋一兩個模仿土共嘴形嘅傳媒點紅點綠。阿董呀，醒吓喇好唔好？土共點你撼頭埋牆，點足六年，係咪要再一吓吓砰砰聲咁撼落去，撼到腦漿都標埋？
傳真︰2623-9278
電郵︰