平日睇馬仔一係就要喺馬場，一係就要坐定定喺電視機前面。不過，最近有四十隻馬仔喺馬場跑咗出嚟，去勻全香港。會否發生危險？少擔心，佢哋全都係畫上漂亮圖案嘅馬仔裝飾，而且只要揀出你嘅心水靚馬，重有機會贏取萬元黃金！
記者：陳震霖 攝影：陳智良
Model：Steven、Rainbow、Va（StarLegendWorkshop）
鳴謝：香港賽馬會
四十隻馬仔進軍全城，原來係「響應」馬會的「全城去馬」活動，藉住睇馬仔行動推廣旅遊。這些靚靚馬仔，原來遍布香港三十個地方，就一齊睇睇馬仔帶大家去邊度玩！
第一個搵馬目的地：金紫荊廣場，因為這裏馬仔陣容最鼎盛！七隻馬仔一字排開歡迎你。你睇佢哋隻隻炯炯有神，一睇就知狀態弗到漏。呢幾隻馬仔都色彩繽紛之餘又各具特色，有「香港國際賽事」駿馬，「國際騎師錦標賽」駿馬，「食品王國」、「歡呼香港」同「龍馬精神」，主題都係推廣香港精神。
歎住咖啡睇靚景
睇完馬，係時候周圍玩，金紫荊廣場背後嘅會展中心，最好嘅節目就梗係歎番杯茶，一面欣賞維港景致啦！會展裏面嘅食肆唔少，提供多個角度嘅維港靚景，而其中的維港咖啡閣可以飽覽270度維港醉人美景。
地址：灣仔博覽道1號香港會議展覽中心新翼
電話：25827731
查實呢四十隻五彩繽紛嘅馬仔，係「全城去馬」駿馬設計比賽嘅作品。三隻得獎靚馬，其中一隻擺放地點係紅磡火車站，呢度嗰隻「全城去馬」就係駿馬設計比賽學生組的得獎作品。馬上面記載住香港交通工具的演變，十分有心思，勝出真係實至名歸。
必食怪味雞
喺紅磡九廣鐵路總站睇完「四通八達」，大家都可以去隔籬的都會商場。商場面積約三十三萬平方呎，係區內最大型購物中心。喺各式食肆中，有呢間小魚滋味，佢嘅「曲香怪味雞」定要一試。雞先用雞湯浸熟，然後再用香味更濃的麯酒烹調。味道出奇可口。售價：$48
地址：紅磡都會廣場七樓747-748號舖 電話：31628559
另外兩隻得獎馬，都可以喺立法會大樓毗鄰嘅皇后像廣場搵到。佢哋分別係專業組同公開組嘅得獎作品，「光芒四射」同「童真世界」。前者，馬匹上印有維港煙花美景，表示香港喺國際舞台光芒四射，而後者就印上一幅幅歡欣的兒童笑臉，而我最喜歡就係呢個設計，一睇到個人都醒神晒。
係咪覺得好奇怪，點解金紫荊廣場嗰邊數來數去都只係得六隻馬，因為其中呢隻，即將會轉移陣地去到黃金海岸，嗰邊嘅位置會由另外的馬匹補上。至於呢匹「水墨世家」，係將傳統的水墨詩詞國藝畫上馬匹，中國風馬仔，感覺都幾得意。
藝墟又買又玩
咁遠嚟到屯門黃金海岸睇中國Feel馬仔，當然唔會要你白行，因為呢度出名景靚沙幼，有嘢食兼有嘢玩。每逢周末、日及公眾假期，海堤有不少形形色色的藝墟攤位，有精品、繪畫、食物等等。
搵馬先去投注站
「全城去馬」是十二月舉行的香港國際賽事的前奏活動，由15/11至31/12舉行。四十款按真實比例製造的玻璃纖維駿馬放置在香港三十個地方。只需答中參加表格內的問題，並為自己喜歡的駿馬投下一票，馬會就會喺得票最多的馬匹的選票中抽出幸運兒贏取萬元黃金！詳情可到投注站或登入
