原來溫故真係可以知新，周一提過美股杜指現時類似9月尾的偏弱走勢，但10月1日杜指出現一支近200點升幅的大陽燭，杜指當堂扭轉劣勢，之後再創今年新高。
正係話口未完，周一晚杜指馬上回升119點，日線圖以大陽燭升穿50日線及10日線阻力，在20日線之前停步，同10月1日的走勢何其相似，至於稍後杜指會否跟埋下半部走勢再創今年新高，真係要拭目以待。
好友噚日乘勢大反攻，淡友可能幾日贏埋唔夠1日輸，期指單日大升193點，收12008，恒指亦收12008，升159點，計及滙豐（005）除息因素，期指其實已轉炒高水。近期港股主要跟隨外圍走，所以要昅實美股。
滙豐昨日高見119元，最多升過2.50元，可惜收118元，未能突破短期降軌阻力118.50元。
由11月初至今，滙豐似形成一條平行下降通道，頂部阻力在118.50元，底部支持在113元，如果滙豐未能突破118.50元阻力，就算只在通道內運行，其實亦不利港股再升。
中移動（941）平底三角形走勢亦已運行逾半，現時降軌下降至22.90元，底部支持在21元。若兩大藍籌不能突破上述頂部阻力，港股短期再升空間有限，繼續牛皮偏軟的走勢。
倉內3股昨跟隨大市上升，但由於先前股價偏強，升幅不及先前作出較大調整的股份，但中長線前景不差，稍後會再發掘一些較落後的細價股作中長線持有。
趙飛雲