有個近排銷聲匿迹嘅男藝員，咁啱馮仁昭有個朋友喺上個禮拜見到佢，但竟遭對方明目張膽咁昅佢小便。
上周五下晝三點幾，馮仁昭位朋友行經金鐘太古廣場，人有三急去咗二樓嘅男廁解決，當時佢正拉低褲鏈準備喺尿兜小解之際，突然發覺原本喺隔一個尿兜小便嘅男士，無端端企咗喺佢隔籬。
呢位男士小解之後，連褲鏈都唔拉，就咁企喺馮仁昭位朋友身邊，重打雀咁眼望住佢嘅重要部位，朋友一望之下，至發覺呢位仁兄竟然係過氣男藝員！
馮仁昭位朋友睥咗佢一眼，男藝員就即刻望去第二度，當冇事發生咁行開咗，馮仁昭位朋友拿拿臨小解，馬上洗手走人，但男藝員就隔咗成十五分鐘先離開廁所，唔知做乜搞咁耐呢？
馮仁昭位朋友認真慘，就咁蝕底咗畀男藝員，男藝員好眉好貌，竟然鍾意昅男人小解，馮仁昭提議佢應該睇吓心理醫生。
由內地紅到日本嘅人氣組合女子十二樂坊，喺今年除夕夜嘅《紅白歌唱大賽》，應邀同SMAP一齊做壓軸表演嘉賓。SMAP成員草囗剛早排喺節目《SMAP×SMAP》入面，竟然一個人扮晒女子十二樂坊，佢又拉二胡，又彈琵琶，成個貞子咁樣，唔俾佢嚇死都笑鬼死！
名模歐陽妙芝日前幫雜誌影婚紗相，佢決定咗出年同男朋友結婚，唔知係咪因為妙芝係待嫁姑娘嘅關係，所以佢着婚紗嗰陣寧舍醒神。妙芝影相時，聽到音樂竟即時跳舞，佢話：「我自細就學芭蕾舞㗎啦！」唔知佢結婚嗰晚會唔會即興表演一吓呢？
王菲日前去台灣宣傳新碟，噚日佢結束行程離開台灣，唔少歌迷專登去送機。王菲呢次總共帶咗九箱行李去台灣宣傳，佢噚日走都大堆行李。
王菲喺台灣重破例，又打波又煮餸，好鬼親民，令當地歌迷耳目一新，難怪歌迷唔捨得佢走啦！
邵傳勇今年四月一日愚人節，牽涉一宗交通意外，佢喺清水灣一個停車場倒車駛離車位嗰陣，撞到後面一架私家車。邵傳勇早前被裁定一項不小心駕駛罪名成立，噚日喺九龍城裁判法院被判罰款一千五百蚊。邵傳勇之前已經有兩宗交通案底，分別係醉酒駕駛同超速。案件編號：KCS6983/2003
蔡一傑噚日接受港台節目《娛樂滿天星》訪問，主持人蘭子一見到傑仔即刻摸勻佢全身，重係咁讚傑仔身材好。傑仔話佢下個月出個人大碟，心情好緊張，問到佢喺樂壇咁多年，最想做乜嘢？佢話：「最想開個人演唱會，我隨時都準備好㗎喇！」唔知佢噚日咁樣任蘭子摸，係咪都係一早準備好嘅呢？
