外圍造好，港股噚日亦勁升，重上12000水平，升159點，收報12008，但成交金額只得107.4億元，動力唔算強，但即月期指成交就接近4.6萬張。黑客話，臨近期指結算，先前造淡的大戶開始平11月淡倉，推高期指之餘，連帶恒指都升埋。不過，12月份嘅期指倉據講好騎呢，有大戶轉好倉，但亦有大戶繼續造淡，情況並非一面倒，而12月份走勢可能由櫥窗粉飾活動主導。
品質（243）傳出會炒高至3元以上配股，股價最近確曾升逾3元以上，但無耐就腳軟，好似噚日被質低5.8%至2.85元，成交高達3167萬元。品質旗下樂依文第2季再蝕290萬美元，經營情況未算樂觀，可能會對品質批股亦有影響。
世紀建業（079）噚日復牌，話會入股澳門博彩業務，雖然只係斥資1170萬元入股兩間與賭博娛樂事業有關的銀團各5%，但已經刺激股價勁升近倍，收報0.049元，足以反映市場對賭業有幾憧憬。日後新濠國際（200）正式入股角子老虎機賭業時，市場反應可能更加瘋狂。
千禧智慧（724）股權易手兼獲全購，每股作價0.34元，股價復牌即勁升60%至0.40元。究竟係股價升過龍，定係市場對新股東科達（673）副主席黃創光有信心呢？科達最近引入國康後，又引入瑞士基金做股東，成績都算有目共睹。
另外，恒盛東方（279）亦勁升55.7%，收報0.095元，市場又傳出將有收購動作。
阿虎