如果董建華要向一個人學習何謂膽識，係人都建議佢向前港督彭定康虛心學習，點解？八方噚日睇到外電，話身為歐盟外交專員嘅彭定康最近去斯里蘭卡，見完當地總統庫馬拉通加夫人，竟然膽粗粗打算走去「泰米爾虎」游擊隊根據地，見創立游擊隊嘅領袖普拉巴卡蘭，睇吓可唔可以重開和平對話喎。
結果佢重未離開科倫坡，所住嘅酒店已經俾數以百計憤怒嘅親政府人士包圍抗議，大叫"WhiteTigergohome"（白老虎滾蛋），重焚燒肥彭嘅假人像。肥彭嘅反應只有一個字"Wonderful"（好極了）。
睇怕啲斯里蘭卡唔知肥彭出名冇有怕，當年北京大罵佢係「千古罪人」、「妓女」，「毒蛇」，佢都照推政改。咁肥彭今次連斯里蘭卡槍林彈雨嘅內戰都唔驚，阿董係咪要學習？
傳真︰2623-9278
電郵︰