近年狀態大勇、並先後推出多款新車嘅德國寶馬車廠，最近外國方面就有消息傳出，指佢哋正密謀於2007年前，推出多達25款新型號；其中最受注目嘅全新1系，就有望於明年下半年率先登場。
該消息指出，全新1系嘅三門或五門掀背版，將會響明年10月登陸英國市場，至於最多用家選用嘅四門版型號，則會緊隨其後於2005年初推出，並實行與平治A-Class、福士Golf及奧迪A3對着幹咁話。
從預想圖中可以睇到，全新寶馬1系嘅造型，與當年曾在各大車展上展出嘅CS1開篷概念車極為相近，其中車頭部份最能將呢個特點展露出來；除此之外，流暢嘅車身線條，亦令車子散發出一陣陣誘人嘅魅力。至於車廂方面，則由於暫時未有關於呢方面嘅資料，故有待收到進一步消息後，方能確實其配搭。
然而，廠方亦為用家提供多個引擎配搭選擇，當中包括1.8公升、2.5公升及3.0公升型號等等，匹配6前速手波或6前速自動波，性能表現可謂毋庸置疑。有興趣嘅車迷，不妨拭目以待喇！