美股又再生性，港股跟住彈升，「感覺好好」，恒指重上萬二點。似乎市底唔錯，恐怖襲擊事件影響淡化，有機會逢低要買。
紅籌亦有勢，中遠太平洋（1199）收9.55元，升25仙，Call輪9863做咗第2大升幅輪王，收80仙，升幅29%。隻輪已屆末日，溢價2.6%，槓桿率11.9倍。
正股通常一口氣跌同一口氣升，轉勢繼續睇好，不過炒中遠Call輪得9863啱價，奈何市場冇乜貨，交投疏，難買到手。
太A（019）跑贏大市，收44.20元，升1元，走勢向上，諗吓Call輪，9877唔錯，下月到期，輪價78仙，負溢價0.2%，槓桿率5.7倍。另外隻9660，由1.28元散落1.04元，跌幅19%，正股升而隻輪跌，係因為正股先排跌之時，隻輪冇成交，未跟正股跌夠，隻輪現價諗得過，衰在成交實在太少。
隔晚紐約滙市，歐元兌美元碌落去，兩隻歐元窩輪，輪價大變。歐美Call輪9880（啱睇好歐元者買）散16.5%，歐美Put輪（啱睇淡歐元者買）9827升22.2%，兩隻滙價輪，暫時不適宜做買賣。買9880，驚歐元重有得跌。買9827，除咗驚歐元上番外，下月到期，時日無多，溢價5.4%似乎高得滯，雖然槓桿率207.9倍非常爆炸。
章盛