早幾日，響報紙嘅外電消息中，得知德國福士車廠旗下嘅Phaeton車系，由於有多達12部新車不翼而飛，因而被外間戲稱Phaeton為幽靈車；雖然睇落不過係一單語帶諷刺嘅報道，惟亞Mark反觀若然真係被偷的話，呢班賊仔確實係好識貨。
事關呢部福士旗艦車Phaeton，雖然名氣及不上平治S-Class及寶馬7系，惟亞Mark身邊有外籍友人，曾試乘過此車，對其舒適性及豪華程度；均有上佳嘅好評，只可惜香港車迷，至今仍未有機會見識過。歸根究柢，本地代理仍未得車廠給予一個好價錢，令Phaeton未必能夠抗衡同級勁敵嘅7系同S-Class囉！
據知，若然Phaeton正式在港出售的話，除代理要重新粉飾Showroom之外，佢哋重要投放一筆可觀嘅金錢，買入一套Phaeton嘅售後服務同維修設施，以便代理跟德國車廠24小時聯繫，隨時替尊貴嘅Phaeton車主，提供迅速嘅汽車護理服務咁話。
想見識咁High-tech先進嘅貼身服務，又對Phaeton有興趣嘅車迷，就要耐心多等一會至明年中喇！