究竟西九龍文娛藝術區項目會否變為另一個地產港，最後只益咗一個地產發展商，現在仍未知道，不過對於呢一場爭拗，立法會議員就肯定會咬住政府唔放。事緣八方噚日去立法會，聽議員討論西九龍項目，房屋及地政規劃局局長孫明揚繼續強調，西九龍「並非地產項目」，故要向各界包括地產界尋求新思維發展該項目。
心水清嘅地產及建造界立法會議員石禮謙，即刻揪孫局長後腳，「局長話呢個唔係地產發展項目，但提及到地產商，都講咗好多次，咁重唔係地產項目。」石議員重批評政府，咁大個西九龍項目，推出之前唔先行攞去立法會討論，乜嘢都自把自為自己定晒，一番批評之後，石議員話唔使孫公回應。不過，孫公即刻搶白，「一定要回應，我對得住自己良心。」
另外，西九項目最殺食嘅天幕，當初估計建造費係十億港元，但噚日拓展署九龍拓展處處長關柏林話，建造費上限可能係三十億元，下限則係十億，即係隨時又要加碼。
傳真︰2623-9278
電郵︰