趙飛雲噚日上到股票行，居然人影都唔多隻，起初重以為自己睇錯表到早咗，原來前晚好多人賭波賭通宵，唔少股友重同周公傾緊偈。
事實上，噚日個市又實在靜得驚人，早市成交只有43億元，全日成交更只得75億元，係7月25日以來最低成交，恒指開市初段下試50日線（現處11787）獲支持反彈，午市曾倒升50點，但臨尾再有回吐，最後僅升8點，收11848。
期指周四結算，但全無大戰氣氛，期指高低波幅只有90點，重窄過恒指，最後升25點，收11815，低水33點，大概係滙豐（005）除息的幅度。
大市雖牛皮，個別股仔仍有表現，例如意科（943）就彈升近8%，收報0.34元。呢一系股份近期頗為活躍，系內之御泰國際（155）月初就曾經炒得有聲有色。
意科本身亦有動作，較早前配售一批認股證集資，呢批窩輪以每份7仙配售，行使價0.28元，換言之接貨者嘅行使總成本為0.35元。照計日子，隻輪下月上旬應可掛牌，到時正股或有一番炒作，話唔定會見4毫樓上。
不過，大市氣氛麻麻，炒股不宜高追，要買意科，都係等佢回到0.33元至郁手。
上周二提過可在2.75元附近吸納中石油（857），上周五受中石化（386）大跌拖累，跌落2.70元收市，噚日見守穩三角形底部反彈，在2.725元先買入5萬股，短期料在2.70-2.90元上落，升破2.90元加注。
趙飛雲