世界發生咁多大事，港股觀望氣氛極濃，恒指高低波幅得96點，好多大藍籌，有如俾人點咗穴，限價成交，成交得番75億，兩個幾月未見過咁低。睇多三兩日，睇吓美股點走，先至決定點炒，如果落注，都係怡情注碼算數，以免傷身又傷銀。
聯通（762）收購9省市電訊業務，大行批評作價唔得吸引，不過由於股價上周已跌定先，昨日冇跌，升1格，收6.75元。聯通Call輪9884，成10萬份，輪價就由45仙踢上55仙，升幅22%，輕易做咗是日輪王。隻輪重有1個月壽命，溢價4.4%，槓桿率12.3倍。隻輪追唔過，其他正規輪如9172、9186，分別上升4%與9%，亦唔適宜多手，5至6個月壽命，14倍幾槓桿率，溢價去到24至25%，短炒難講係贏係輸，唔覺意揸耐啲，蝕溢價可以蝕到叫救命。
上龍虎榜嘅輪，有隻中石油Call輪9901，由36仙彈上40仙，升11%，今時環境，有此升幅非常醒神。正股（857）收2.75元，升斗零，帶起隻輪。9901有102球易手，買家重手做嘢，但隻輪明年8月到期，溢價去到12%，槓桿率6.9倍，溢價過高。玩中石油Call輪，9881抵食得多，用較低槓桿率換取較低溢價，比較化算。
章盛