聖誕節愈嚟愈近，大業主持有嘅商場都趕裝身，吸引消費者，信和旗下九個商場就以「彩虹繽紛」做主題，每個商場用一種顏色，紅、橙、黃、綠、青、藍、紫七種顏色全部用齊。再配合一連串活動同抽獎，總共花費二千萬。
剛完成翻新嘅尖沙嘴中港城商場較特別，用上「彩色」嚟裝飾，今個禮拜六同日，重推出十蚊享用一個鐘自助餐優惠。而用上「藍色」嘅大角嘴奧海城商場，十二月十三日起會有「藍極古董馬車」免費攝影站，展出全港最大嘅童話式古董馬車。以浪漫色調「紫色」做裝飾嘅屯門市廣場，會舉辦「紫醉金鑽浪漫情」珠寶滙演，請嚟藝人張慧儀、陳嘉容同Rosemary等，展示逾八間珠寶公司嘅新款設計。
另外，發展商又請嚟澳洲著名管弦樂團喺商場表演。總之就係要令消費者多啲幫襯。
息口低，舖位投資回報率高，再加上近期掀起嘅一股熾熱炒風，唔少有意投資舖位嘅準買家致電經紀行查詢，投資舖位應注意事項，因此中原地產今日特別舉行講座，解答投資者疑問。
主持今次講座嘅中原商舖部總經理潘志明話，暫時約有五十名有意投資舖位人士登記，佢預計最終可以招待一百人。講座內容特別針對價值三百萬以下的小額商舖投資，將會有銀行職員即場解答按揭問題。
而為咗今次講座，中原重租咗旺角創興廣場七樓幸福海鮮酒家全層，認真大手筆。
上海龍頭地產代理金豐易居．鴻運國際，上個禮拜喺香港搞咗個房產展，蘭西去睇過，反應都唔錯，場內主要係賣住宅，但原來商場舖位重受歡迎。
位於上海南京西路嘅「HK100駿豪國際商場」，因為係同區罕有可以分拆出售嘅商場，所以預留嘅單位總值達一億三千萬人民幣。呢個場只係拆售四層，面積五百至四千餘方呎，售價每呎約四千六百蚊至近一萬八千六百蚊人民幣。
另外，將會喺本月底開賣嘅上海盛世年華，千五個單位已經收到七千幾張認購票，聽講重有買家排隊輪候。
中區大地主嘅置地公司，喺東南亞都有唔少投資，原來佢哋進軍越南商廈市場已經有成十年咁耐。置地公司總裁蘇兆明噚日重親自去越南河內，出席呢個慶祝儀式。
置地喺越南嘅第一項商廈投資係CentralBuilding，總樓面四萬方呎，包括六層寫字樓、舖位同停車場，出租率達一百個巴仙。租客有大使館、銀行同跨國企業。置地佔呢個項目百分之七十三點五權益。
而置地喺河內重有一項「63LyThaiTo」商廈物業，總樓面七萬五千方呎，佔七成七權益。
唔少追求居住空間嘅買家，都會鍾情獨立屋，貪有幾層高，重有花園同天台。長實喺元朗錦田嘅四季雅苑，就正正係呢類設計。
由於係典型新界區洋房住宅，有成一百一十多間屋，地盤有成二十八萬方呎，為咗方便管理員巡邏，賣樓話事人袁添鴻話，已訂購一部價值七萬蚊嘅哥爾夫球車，等管理員可以緊密巡視整個屋苑。
以往呢類車通常用喺內地嘅樓盤，因為屋苑地方太大嘅關係。而香港嘅愉景灣亦有唔少住戶使用。
蘭西
電郵地址：