八方噚晚收到風，話鄭家富因為掛住同何淑萍拉票，為打低劉江華，自己大埔中忽然告急咁話。
但正如佢自己之前評估，佢同對手正式係1比99，阿富冇理由會輸，最後梗係證明係流料，不過，阿富形容自己嚇到「鼻哥窿冇肉」，因為港大鍾庭耀博士嘅票站調查好少錯。
講番轉頭，今次民主黨都算執到，因為好多住喺私樓嘅中產以行動表示不滿，喺冇得洗樓嘅情況下自動自覺去投佢哋一票。李永達話以華景山莊為例，投票率達五成，而有啲私樓，上次只有一千人投票，今次急升至三千人，就知道厲害，所謂民心向背，變天係遲早嘅事，胡溫曾董真係有排驚。
不過，八方有班擁民主派嘅朋友就投訴楊森哋太保守，鬥心太低，好多地區都冇人參選，眼巴巴睇住個位俾老左自動當選，你話幾冇癮呢？楊森、何俊仁、李永達、劉慧卿等等收唔收到？
傳真︰2623-9278
電郵︰