前晚意甲拉素對佩魯賈，德甲凱沙羅頓對柏林哈化都充滿戲劇性，簡直係球迷奇遇記。拉素十人鬥八人贏對手三個一皮，「讓球主客和」由「客勝」、「和」到最終「主勝」，所講緊嘅都係完場前幾分鐘嘅事；柏林哈化明明半場領先兩球，下半場失驚無神反輸四粒，兩場波嘅客隊捧場客肯定瞓唔着。
拉素場波完全失控，兩軍職球員完場前多次口角、踢人、講手、推撞，連佩魯賈教頭哥斯美都老羞成怒多次發火。埋單計數拉素有干斯卡奧，佩魯賈就有哥斯美同埋三件正選後衞先後被逐。大混亂過程中，哥拉迪響八十七分鐘射成二比一，S恩沙基更喺補時三分鐘笠射埋齋，戲劇性收場。
捧柏林哈化嘅波友重慘，話唔定完半場放心沖涼等第日收錢，沖完涼出嚟就睇住「哈化餅」輸完一粒再一粒，體會由贏變輸，真陰功。
俄羅斯中場莫斯杜禾最近惡行連連，上周歐洲國家盃附加賽對威爾斯時，已挑釁對方嘅沙維治，話人哋係弱者；日前喺切爾達操練後被記者追訪，又出言恐嚇對方要小心行文！切爾達今季成績倒退，周日聯賽又輸畀畢爾包，你話同阿「禾哥」成日顧住搞事，冇專心踢好波有冇關呢？
今季NBA整體得分下降，打咗一百四十幾場波，平均得分都係九十分左近；當中啱啱輸畀公鹿嗰場攞得六十二分嘅速龍，可以話「陀衰家」；今季打咗十三場就有七場得七十分以下，拉到平均分低晒。再咁落去，速龍「改寫」五年前公牛嘅八十一點九最低平均得分嘅紀錄都唔奇。
暫代領隊職嘅熱刺足球總監柏列特，又爆料話球會及愛爾蘭國家隊助教「大眼仔」曉頓，有能力坐正做領隊！唔好話好求大俠陰謀論，柏列特梗係想由話晒都係佢下屬嘅曉頓執教，到時曉頓就會做咗木偶公仔，佢繼續做扯線嗰個，有咩鑊都係曉頓揹。呢啲咪叫老謀深算囉！
布力般今屆明明係後防唔掂，但係領隊桑拿士偏偏繼續搵前鋒，最近就打算畀前羅馬尼亞國腳艾利試腳。講開「眼鏡蛇」艾利，我求大俠都有啲心噏，佢質素唔差，𠵱家只係二十九歲，重當打，偏偏落唔到班，我都希望就算佢喺布力般落唔到腳，都很快搵到好人家。