冷門金融股金英控股（727），近幾日股價突然大升，睇落動態唔多尋常。
金英噚日最高見過3.50元，收3.40元，再升10.57%，成交股數則為區區29萬大股，金額98.8萬元。
小初向年輕賓架索料，佢話隻股炒上主要有兩個原因，一係賣殼舊聞新炒，二係憧憬公司會派特別股息。
金英放盤一事，其實一早傳到街知巷聞，事實上，公司之前都承認斟緊賣盤，但搞咗好耐都唔掂，主要因為公司持有過億銀現金，所以殼價叫得好高，唔係咁多買家可以應付，加上星洲大股東堅持賣殼手法要乾淨，亦令賣殼難度增加。
年輕賓架話，如果金英真係賣得出，買家相信必定有番咁上下斤兩。
至於派特別股息方面，金英上市咁耐，一直都有一鋪派高息癮，加上將現金當股息分畀股東後，可以令殼價下降，令賣殼難度減低，所以大派高息可一舉兩得，並非冇可能。
慕容小初