三星之前部炒機王E700賣咗都係一個月到，話咁快又有新版本推出，今次就唔係加啲咩MMS咁，而係加番盞閃光燈，令影相更加好，同埋個殼嘅顏色都換咗，當然E700嘅6萬5彩芒、40和弦同30萬像素鏡頭都冇少到。雖然今次嘅震撼程度就冇之前E700個勢咁勁，炒到火紅火綠咁，不過反而令到去貨幾好，因為開價都係三千零蚊，好多人都重肯畀。
查詢：23987320（鉑匯科技）
今期好鬼多新機出，不過喺手機場最熱賣嘅，係出咗街成半年嘅索記T610。點解？好簡單，一個字「平」！各大台行貨做緊約$2,600，水貨已經落到$1,700-$1,900，差唔多平成千蚊，難怪呢期見到唔少T610喺個場度游嚟游去。不過羅新基都係嗰句，食得鹹魚抵得渴，水貨壞起上嚟就隨時搵個人影都冇，想有保證都係行貨穩陣。
索記玩藍芽玩咗咁多件，藍芽「波凸」點都多過人，最新報到嘅就有呢個HBH-200藍芽耳筒，細得嚟之餘重要有個LEDDisplay睇來電號碼，加上賣相認真唔錯，當羅新基都覺得係必買「波凸」時，發現要$950，當堂由必買變成必睇，話晒大拿拿用成K買個耳筒，都係要返屋企從長計議先得。
查詢：23902680（星匯通訊）
文：羅新基
