最新一期嘅美國綜藝雜誌《EntertainmentWeekly》搞咗個「五十部最佳催淚電影」選舉，結果八三年喺奧斯卡囊括最佳電影等五個大獎嘅《常在我心間》，順利成為第一位。
由莎莉麥蓮（ShirleyMacLaine）同積尼高遜（JackNicholson）主演嘅《常在我心間》，故事係講一個患癌媽媽嘅坎坷故事，《EW》編輯部話人人睇完套戲都喊晒口，所以攞冠軍係實至名歸！至於迪士尼四二年作品《小鹿斑比》就排喺第二位，講真斑比目睹媽媽俾獵人殺死嗰幕，又的確係幾感動嘅！
講番呢個選舉，頭十位多數係較舊嘅電影，好似第三位梅麗史翠普（MerylStreep）嘅《蘇菲的抉擇》，同第四位由加利格蘭（CaryGrant）主演嘅《金玉盟》，真係冇幾多個後生仔睇過！不過十大裏面都有為人熟悉嘅電影，好似第八位電影《E.T.外星人》同埋第九位嘅《人鬼情未了》。
另外，好多女士睇完喊到收唔到聲嘅意大利電影《一個快樂的傳說》同大熱愛情片《鐵達尼號》，亦分別排第十四同十五位，至於由華人導演王穎執導嘅《喜福會》同埋李安執導嘅《理智與感情》，就排喺第二十二同四十五位。