中大校友事務處處長俞靄敏今次真係開心到不得了，皆因由佢統籌嘅《中大人家》話劇好受歡迎，前晚做壓軸，竟然連新聞人物李國章都忽然出現跑埋上台，真係大團圓結局。
俞靄敏話件事太突然，李國章最近因為班學生仔揚言罷課，頭都大埋，所以一早推咗唔到，點知星期日李局長喺馬會食飯，咁啱撞到中大護法香樹輝，阿香猛讚套劇正，叫李國章一定要去捧場，睇下半場重嚟得切，重喺身上攞埋個後台證畀李國章。
李局長忽然好心動，於是飛車由沙田趕去尖沙嘴，中場喺後台出現打氣，令啱啱由日本返嚟參演嘅張敏儀嚇一跳，於是黑麻麻帶局長入座，睇埋下半場。俞靄敏話好彩張大姐通知佢一聲，等佢有幾分鐘時間度台詞，謝幕時請出當年大力支持公演呢套劇嘅李國章上台，齊齊合唱中大學生會會歌。
呢個世界充滿巧合，編劇都編唔出咁嘅結局。
（圖）李國章（箭嘴示）同台前幕後一齊謝幕，為《中大人家》畫上完美句號。
傳真︰2623-9278
電郵︰