過氣女星自從同一個鍾意吸毒嘅女性朋友行得好埋之後，佢嘅銀色前途就係咁先喇！鬼叫佢當啲軟性毒品好似糖咁食，周不時搞到自己神志不清，人哋想搵佢做嘢都驚埋唔到尾，所以盡可能都唔會勞煩佢。
呢輪過氣女星喺郊區住，佢嘅精神病就愈嚟愈厲害，佢竟然同朋友講，話屋企唔「乾淨」，夜晚部電腦會跳隻幽靈出嚟，鍊佢條頸喎。佢講到繪影繪聲，班朋友好擔心佢，曾經勸過佢睇吓精神科醫生，當然佢唔會覺得自己有問題，點會聽得入耳呢？
個個朋友都勸佢唔好再啪丸，原本早排佢都聽話，戒咗一輪，精靈過一排，唔知點解呢輪又食番，情況又嚴重咗。
葉麗儀同葉蒨文早幾日去咗新加坡為《公益獻愛心》演出，葉麗儀大唱首本名曲《上海灘》，佢唱歌嘅時候，大會收到二萬一千幾個電話捐款，係咁多表演藝人之冠。而葉蒨文表演時就有六千幾個捐款電話，排第三。葉麗儀𠵱家雖然好少露面，但係一出場就證明咗佢嘅實力啦。
米雪同埋胡美儀噚日去咗港台，做《精靈一點．健康一點》嘅嘉賓。佢哋喺節目入面主要係同聽眾分享癌症治療，同埋預防方法。米雪同胡美儀話覺得最重要係有健康嘅飲食同生活習慣，而且保持心境開朗亦都好重要，唔怪得佢兩個咁多年嚟都keep得咁好啦。
蔡慧敏早排去新西蘭玩咗十日，因為嗰度玩嘅嘢唔係咁多，喺賭場賭錢就變成佢嘅娛樂，好彩消磨時間之餘，重有斬獲，贏咗兩萬幾港紙，變咗免費旅行。不過呢頭開心完冇幾耐，佢就因為食得太多生蠔，搞到肚痛，佢重話𠵱家終於知道乜嘢係病從口入喎。
內地有消息指菲律賓服裝品牌「Bench」最近以一千二百萬人民幣搵言承旭拍廣告。言承旭嘅經理人支向理話：「沒有一千兩百萬人民幣這麼高啦！不過也快接近一半，反正是台幣八位數就對了！」唔理佢收乜嘢貨幣，總之言承旭真係接拍就發達啦。
