醫生E十年前繼承父業，棄醫從商，果然春風得意，賺錢多過做醫生，兼且經常可以放假旅行，因為生意可以有夥計暫管，唔似得做醫生咁，日日睇症，放假一日就損失不菲也。
醫生E時時話食紅肉唔健康，多膽固醇，佢自己嘅食譜以雞肉、魚為主。食食吓，更鍾意食魚生，認為頂級toro，無以尚之，試過去東京過周末，連續六餐都食魚生。
呢日同佢食飯，佢竟然對東星斑淺嘗即止，又唔肯如常咁食埋魚頭，大家問：「點解呀？」醫生E話：「唉吔，前幾日睇《蘋果日報》，講及魚翅含水銀量最高，紅衫魚次之，其他魚類亦有，我食慣魚翅、東星斑、深水魚生，從來都以為冇事。但曾經做過醫生，睇見呢啲新聞，心裏有戚戚然，於是特登去老同學嗰度驗血、驗頭髮，今朝報告出嚟嘞，老同學打電話嚟通知，我嘅體內每公斤體重含鉛量係三點七微克，而世界衞生組織嘅安全標準每公斤不超過五微克。咁我以後食乜嘢好呢？惟有聽老同學醫生吩咐，食少啲魚，唔好畀水銀含量增加。」
本來大家都想食東星斑魚頭，以前大家見到醫生E，梗係讓畀佢食，君子不奪人所好嘛！但今日聽佢咁講，竟然冇人搶食魚頭噃，一味你推我讓，最後由左丁山捱義氣，只係食咗腮肉就算。我哋咁樣，唔怪得香港漁民團體好唔高興，而魚販生意大跌，紅衫魚、桂花魚嘅銷路更傷。食完飯，講拜拜之後，醫生E提醒眾人：「得閒就去驗吓血嘞！」