如果有人再做民意調查，問香港人最快樂係乜嘢，八方諗除咗7.1大遊行之外，就係11.23區選，民建聯大敗。當然冇人會同情曾鈺成，因為當日佢自己誇下海口，話如果今屆嘅選舉成績差過上次，攞得少過八十三席，佢就會「炒自己魷魚」，所以佢辭職只不過係「履行承諾」。當然，八方認定，老曾係做緊大戲，扮死狗以退為進，最後好似老董咁，厚住面皮賴死唔走。
八方有位老友前日投票日就收到一個好似由理工做嘅調查，竟然唔係問佢贊唔贊成加快民主步伐，而係接唔接受延至二○一二年先普選行政長官，之後先至全部立法會由直選產生；個調查係唔係受特區政府或者中央政策組委託做，冇人知，但係就可以睇到有人喺度試緊水溫，其實由北京力挺嘅老董同民建聯已經令港人忍冇可忍，再拖盞搞到更多人上街啫。
傳真︰2623-9278
電郵︰