港股噚日觀望氣氛濃厚，成交只得75億元，恒指窄幅上落，收報11848，升8點。
港股觀望氣氛咁濃，唔知同區議會選舉有冇關係，選舉結果預示保皇黨民建聯明年立法會選舉可能敗得更慘，反對黨抬頭意味政府日後做任何決定，包括滅赤等都唔易獲得立法會支持，財爺今次肯定頭大，相信唔少證券行要重新衡量本港財赤等宏觀經濟問題。
早前配售認股權證的意科控股（943），近期走勢反反覆覆，噚日就抽高7.9%至0.34元。上次配售嗰批認股證每份作價7仙，行使價0.28元，總成本0.35元。黑客話，意科暫時會守住呢個水平，等批股證上市後就會正式開車，到時正股與股證一齊起飛。
21世紀通（241）大股東上周減持逾13.44%，持股量降至24.65%，所以持股量26.4%嘅北京中信已變成大股東，令市場憧憬北京中信會繼續向公司注入電訊增值服務業務，從而增加公司股權，刺激21世紀通急升5.88%至0.90元，成交高達1.035億元。股價咁升法，當然亦會加速前大股東減持嘅速度。
港股噚日成交大縮，不過味丹國際（2317）成交就增加至4464萬元，股價勁升13%，收報1.56元，創上市以來新高。公司將帶芬佬同分析員去越南參觀廠房，到時會講解公司盈利前景，市場預計有料到，所以炒定先。
阿 虎