自由黨今次區議會選舉有十三人勝出，黨主席田少話有一半人當選，成績不過不失，可以接受喎，重話佢哋都係7.1效應嘅受惠者。
咁只有班學者先至會相信土共自欺欺人嘅宣傳，話地區選舉只講民生議題，少講政治，直情當7.1冇發生一樣，但實情係，民主嘅種子已經種下，只會日漸茁壯，阻止不了。
自由黨嘅楊孝華身兼立法會議員喺港島南區海灣區勝出，算係執番身彩，至於其他地區，好似新界東，就好似冇乜進賬，睇怕田少佢哋都要開會檢討檢討。
自從7.1之後，田少寧願唔做行會，果斷救港，佢老哥一直非常high，覺得要有一番作為，以謝港人支持，當然佢都花咗好多時間補鑊，咁啱十二月一日自由黨慶祝成立十周年，就順便請老董同一眾高官喺會展飲番杯，希望一笑泯恩仇。
區選證明邊個保皇邊個死，田少重肯畀面老董，睇怕佢一定率領眾馬仔出席，以謝田少不離棄之恩。
（圖）請柬用黃藍兩色設計，自由黨色彩滿瀉。
傳真︰2623-9278
電郵︰