澳洲捕鱷專家利弗兄被元朗土產頑皮小鱷魚搞到冇晒符，就算全香港幾百萬對眼昅住都一定要因為私人理由去一去峇里島，唔知係唔係學番一啲甚麼奇門遁甲的制鱷降頭大法，還是香港市民及記者朋友太熱情，所以壓力太大，點都要先去鬆番一鬆。唔係馬後炮，澳洲讀完書返嚟嘅朋友晨早批咗澳洲專家唔掂，「死梗！阿利弗喺澳洲捉嗰啲鱷魚，大條就大條，不過唔郁嘅，澳洲大部份嘢都唔係太願郁，吓？你嚟捉我呀？好，我唔郁等你捉！」
澳洲朋友見我聽得入神，繼續講：「元朗呢條塞竇窿鱷魚，一睇就知係蠱惑仔，澳洲專家搞唔掂嘅，最好就係去泰國鱷魚潭搵個師傅，過嚟又踭又膝，三兩下手勢搞掂。」
張達明更有驚人獨家內幕，佢話據佢喺大陸拍戲嘅時候聽人講，鱷魚仔係沿岸居民養開嘅，真名叫「阿愛」，重好聰明㖭。故勿論此內幕的真假，但香港市民確然已經同阿愛發生咗感情，希望所有專家可以高抬貴手，捕捉阿愛時可以錫住吓，然後有關方面好好哋搵主好人家安置阿愛，鱷魚好似長命起嚟可以有一百幾十歲命，可能三代都有機會睇到佢，幾有意義。如果捕鱷過程中有甚麼失閃，錯手整親，甚至整瓜咗阿愛，相信全港市民都可能會DownDown哋，起碼我會。