張栢芝繼日前發脾氣叫記者照鏡後，前晚錄影《勁歌》時又表示，向她發問的人IQ低，才令EQ低的她發脾氣，此言一出，令她與傳媒的關係更加緊張。故此栢芝錄影完後，記者以IQ高為由，拒絕訪問她。
張栢芝、許志安、何韻詩、楊千嬅、方力申和鄧麗欣（Stephy）等，前晚到將軍澳電視廣播城錄影《勁歌金曲》。栢芝日前大罵記者，叫人照鏡之餘，又表示可借塊鏡給記者照，令她與傳媒的關係變得緊張。栢芝前晚又再出言侮辱傳媒，事後記者更因此拒絕訪問她。
栢芝前晚錄影《勁歌》時，大談心路歷程，本來五分鐘的時間，在栢芝滔滔不絕下，結果錄了二十分鐘，令在化妝間等候的何韻詩和許志安有點不耐煩。
栢芝被fans問到覺得自己有甚麼缺點，她說：「我EQ太低，唔係情緒唔係脾氣，總之唔係IQ。」主持林曉峰問栢芝何以見得？她說：「我碰到一啲IQ低嘅人，撩到我啲EQ低囉。IQ低係嗰啲問過我問題嘅人，佢哋IQ低過我，問到我EQ都低埋，我入行前都唔知乜嘢叫EQ呀。」此言一出，令記者十分不滿，當錄影完畢後，栢芝的宣傳人員向記者示意可做訪問，有記者說：「佢講咗咁多嘢，我哋IQ高呀，唔做呀。」
另外，有fans前晚在節目上表示覺得栢芝近日開心不少，問為何會有此轉變，栢芝說：「你啲語氣好似狗仔隊啲問題嘅？我落妝時會照吓鏡，我噚日話借鏡畀記者，我認真㗎，唔係寸佢，我唔開心時照鏡會有啲嘢諗通。」
栢芝在節目中又暢談感情事，被問到覺不覺得自己惹桃花時，她說：「係㗎，係膠花唔係鮮花囉。鮮花唔係未遇過，冇桃花咁多囉。」後來栢芝被問到會否為愛情犧性，她說：「家人唔可以犧牲，我唔會瞓晒身。」她又說：「我要揀個最好嘅男人畀所有人睇，我未來搵嘅男人要係搵老公。」
問栢芝為何其戀情總不能開花結果，她說：「唔係我放棄棵花，大佬，換畫嘅唔係我，我都好難過，但我唔鍾意拉住人哋褲腳。我會好開心咁講拜拜，再見亦是朋友，有時會通電話，有事時大家都有心靈感應。」
採訪：李珮如
攝影：何國豪
