沒有國，哪有家，7.1過後爛茶渣。7.1民主精神再次顯神威，區選怒掃保皇黨，民建聯重創，證明鄔維庸失憶，香港人冇失憶，以中產階級為火車頭嘅香港民主大動力，搞到保皇土共勢力冇啖好食。
今次區議會選舉，當初以為中產階級懶得投票──梗係喇，區議會只不過係大牌檔，立法會先至係半島下午茶座（本來重有一層市政局，係星巴克咖啡，後來俾自稱因投票率高而為香港民主感到欣慰嘅董建華使橫手鏟埋），但由於六年來，八萬五、高科技港、沙士儍強自己查自己、23條、高尚情操梁錦松、王見秋鄔維庸大鬧平機會、董班子不停侮辱緊全香港六歲以下嘅兒童嘅智慧，中產階級忍無可忍，為咗保護全港幼童智力嘅正常開發成長，惟有焗住行多次出嚟，私人樓宇嘅投票率創新高，中產階級再次出動，捍衞港人利益，真係氣勢如虹！
到投票嘅最後一刻，民建聯嘅曾鈺成、工聯會嘅鄭耀棠等，重四出洗樓救票。洗樓容易，洗脫二十三條嘅保皇反民主往績難。洗樓容易，洗滌對六四嘅轉軚變臉嘅往事難。洗樓容易，想洗刷做人嘅良心污點難，洗刷香港人嘅歷史記憶？更加冇可能！
何秀蘭贏葉國謙，證明保皇土共嘅無聊抹黑，黑心自有惡報。何秀蘭保障性工作者權益，就俾老左話佢鼓吹叫雞，遭受土共婦人幫辱罵。睇嚟全港全國嘅性工作者，應快啲成立政治自救團體，不但要考慮參選明年立法會娼妓功能議席，長遠重要參選政協同人大代表㖭。
八方有個喺前堅尼地城屠房劏豬嘅堂舅父，住觀龍樓，佢本來唔識何秀蘭係邊個，想投葉國謙，但聽見土共引述何秀蘭話：老婆嘅性服務係批發，而妓女係零售，佢見阿秀身為女人，咁具有跨性別宏觀視野同風趣見識
曾鈺成就例牌玩「辭職」。係「提出」啫，下星期二「中常委」開會，例必「全力挽留」。曾主席以前都出過呢招，搶電視新聞、爭第日各報頭條，淨係搭單一晚傳媒炒作，廣告宣傳利益，都值幾百萬。睇嚟民建聯內精於賭白頭片、搭順風車嘅做生意天才，唔止蔡素玉一個咁少喎。
傳真︰2623-9278
電郵︰