國際米蘭並未因禮拜二火併阿仙奴而留力，前日贈里賈納六蛋嚟祭旗。成場波最唔開心都算係韋利，因為佢攞波時成日被球迷噓，又睇住隊友一個入完波又到另一個，自然無癮。終於，佢幾經辛苦為隊波埋齋，爭番啖氣，證明佢鬥心極強。假如佢對阿仙奴都保持到呢份鬥心，兵工廠都咪話唔驚。
話說盛傳韋利就快較腳，加盟英超球會，加上佢近況麻麻，所以前日場波周不時俾自己球迷噓。唔止咁，睇住隊友簡拿華路射入世界波，馬田斯又舞龍帶波射入，作為王牌射手嘅佢當然唔想執輸，搏盡爭士哥，到中後段死推爛推送個波入網。講真，平時無乜幾可見到呢個射手咁搏命，估唔到球迷喝倒采同埋隊友衝擊至迫到佢心中嗰團火，我係國米球迷就繼續噓佢啦。
些路迪嘅瑞典前鋒拿臣係好波，但佢嘅思想我求大俠就有啲跟唔上。話說呢位講明唔踢歐洲國家盃決賽周嘅球星，傳聞希望去一啲溫暖啲嘅國家踢波，於是收留好多過氣球星嘅卡塔爾可能係佢下個站，但係佢只係得三十二歲，唔係老鬼，咁快去中東搵食，真係嘥料，希望佢三思。
「認錯」係難事，之不過肯承認嘅話，嗰份勇氣一定抵讚！拜仁中場沙里咸美錫前晚對1860時明明冇犯規，但係就被趕出場，激到佢紮紮跳。賽後球證芬度睇番錄影帶後，發現前者冇踩對方球員，已經承認判錯，睇嚟可以打甩呢個紅牌。沙里咸美錫今次都可以話係遇貴人嘞。
英格蘭爆冷奪得欖球世界盃冠軍，隊中「十號仔」韋健遜幾乎射親都中，係球隊捧盃功臣。唔講你唔知，韋健遜喺英國原來同「萬人迷」碧咸齊名，被喻為當代兩名大英最佳死球專家，之前重一齊拍廣告，好friend。所以當欖球隊捧盃，碧咸即刻代表英格蘭足球隊恭喜佢哋。
馬會就快開「首名入球者」賭盤。齋講前晚公仔箱直播比賽，雖然有唔少熱門射手「首入」，但車路士對修咸頓、國米對里賈納就失驚無神整米茲洛同埋簡拿華路兩件後衞，都咪話唔爆冷。唔知呢個現象係咪偶一為之，但貼「首入」肯定夠晒刺激同埋挑戰性。