早陣子，亞Mark曾經同大家提過，話富士香港代理嘅掌舵人王Sir，遲吓要負責集團拓展大陸市場嘅大Project，急需要人選替代其原有位置，點知劇情卻有戲劇性嘅結局，而亞Mark至此並無意尋根究柢，皆因佢哋新加坡總公司，經已搵到合適嘅人選喇！之唔係佢哋負責開新加坡同馬來西亞，富士汽車銷售工作嘅GlennTan囉！咪以為佢對香港市場陌生，繼後工作會有難度喎！查實佢心目中經已有一套鴻圖大計，加上早前佢接手馬來西亞嘅富士業務，響短時間內經已令當地富士汽車銷量急升；而最近適逢日本富士新一代Legacy車系，奪得2003至2004年度日本CaroftheYear大獎，大比數拋離第2位嘅豐田Prius同第3位嘅萬事得RX-8，亞Mark有幸響日本遇上Glenn，言談間得知佢遲吓會引入頂級3.0公升Outback型號抵港外，早前亞Mark曾話過，新一代Legacy賣相要較豐田Camry同本田Accord更具號召力，難得Glenn亦有意明年引進無Turbo、但有AWD四驅嘅Legacy到港，挑戰一眾對手，而引擎配搭重係至出位嘅2.5公升（170匹）新型號㖭！若然你跟亞Mark有同感，想擁有一部非Turbo版Legacy的話，就真係要拭目以待喇！