呢輪個市咁旺，你叫啲師奶太太收手都幾難，有人甚至話，滙控落唔到幾多，係因為啲散戶頂住，真係唔可以睇小女性力量。
趁住個勢咁好，今年內全球最大型上市活動，國企中國人壽快將出台，八方問中壽獨立非執行董事、前工商局局長周德熙擇咗好日未？定咗價未？點知佢話乜都唔講得。
咁點解會入中壽？佢就話可以講畀八方聽。大約三幾個月前，中壽嘅王老總搵人問佢有冇興趣加入，佢當時諗，「咁大間國企，幫吓手，為國家服務幾好。」於是就答應咗，佢當然有睇過呢間準備上市嘅公司之狀況，亦知道自己係保險業外行，要學吓嘢。
做咗董事之後，周德熙已經上咗兩次北京開會，佢話得好少錢，不過，既然已經自政府退咗落嚟，都攞啲唔同嘅經驗。周德熙離職之時，獲中國政府委為外經貿部顧問，即係𠵱家嘅商務部顧問，咁中壽屬財務部，都算有啲關係。
傳真︰2623-9278
電郵︰