身為美國希爾頓集團太子女嘅ParisHilton，呢排因一盒性愛錄影帶搞到佢冇面見人，真係一世wet名盡喪。不過，Paris可以從好嘅方面諗，起碼佢妹妹NickyHilton日日出嚟幫佢講好說話，算係患難見親情！
件事被爆之前，兩姊妹其實去咗日本宣傳佢哋做代言人嘅時裝品牌SamanthaThavasa，佢哋接呢份job純粹為威威，根本冇計過酬勞。
咁着慣名牌嘅兩姊妹，喺日本又會唔會唔買嘢呢？Paris接受日本雜誌訪問時就話：「我哋次次都好多個滿晒嘅皮篋走人，其實我哋覺得日本女仔嘅打扮同美國好唔同，好得意，所以我哋好鍾意去涉谷109商場購物㗎！」嘩！同女高中生爭買平嘢，會唔會俾人話有失身份㗎，Paris即刻搶住話：「我哋唔知平定貴喎！我哋咁大個人，一次望價錢牌嘅經驗都冇嘅！」真係吹佢唔脹！
不過，兩姊妹話佢哋喺日本冇人唔識，次次都俾成班fans追住，Nicky又話：「我哋𠵱家醒目咗，戴黑假髮同埋眼鏡扮俏女教師，成功冇人認出！哈！」