擁有一雙修長美腿的莫文蔚，經常穿着迷你裙大騷長腿。穿衣甚有品味的她，更曾在台灣雜誌舉辦的「金衣獎」中封后，她表示不介意穿着舊衫，只求配搭得宜。她日前穿上母親數十年前購買的貼身衫，配襯D&G香蕉圖案迷你裙，盡顯型格。
莫文蔚甚有獨特穿衣品味，日前她出席活動時，以啡色針織上衣，配襯D&G香蕉圖案迷你裙，腳踏中筒靴示人，雖然服裝均是簡單款式，但卻着得甚有型格。
藝人的服飾一向給人緊貼潮流的感覺，莫文蔚則表示不會盲目追求名牌，她說：「我好多時買咗啲衫未必會即刻着，有時可能已經放喺屋企幾年都未掂過，但我每次出去工作時，都會喺屋企預先配襯啲衫，我鍾意mix&match，唔會將一個牌子着晒上身。」
莫文蔚續說：「有時我可能會將幾年、甚至幾十年前嘅衫着上身，總之我襯過覺得好睇就得。好似今次我呢件衫就係我媽咪嘅，雖然已經有幾十年歷史，但我好鍾意佢夠貼身。」
莫文蔚擁有一雙修長的美腿，所以她亦毫不吝嗇常常穿着迷你裙，大騷美腿。談到護腿心得，莫文蔚說：「最重要喺臨瞓前按摩雙腳同鬆筋，平時我得閒會到美容院做運動保持腿形，如果時間許可，會做腳底按摩令雙腳放鬆一吓。」
採訪：駱華齡
攝影：陳慧安
