「香港中環金融街八號國際金融中心二期五十五樓」，呢個地址，已取代「香港花園道三號三十樓」，成為金管局新地址。任志剛上個禮拜上完京攞完彩，回港之後已正式搬入全港最高嘅國金二期八十八樓辦公，果真係傲視下亞厘畢道嘅政府總部，嘉慧園喺邊，更加係細到用望遠鏡都睇唔到，俯瞰維港兩岸，洗脫屈居美帝嘅萬國寶通中心嘅民族恥辱。
記得任總在外滙基金管理局時代，辦公室喺海富中心，都有海景；九三年金管局成立，遷入萬國寶通中心，不過金管局官方地址，只寫花園道三號，唔會提係乜嘢大廈。事關堂堂中華人民共和國特別行政區嘅央行，寄居於一間美資銀行之內？如果地址被人誤會，真係笑死全世界。所以四十億就四十億，為咗民族面子，四十億，一啲唔貴。
八方聽聞，金管局新居會有資訊中心，十二月開放畀公眾，到時市民都可以上去五十幾樓睇吓我哋任總點樣君臨天下兼吐氣揚眉。
傳真︰2623-9278
電郵︰