填詞界鬼才林振強嘅死，關佢屋企事、關唱過佢啲歌嘅歌手事、關鍾意佢啲詞嘅歌迷事……到底關蘋果基金乜事？
話說當年即係95年，蘋果基金成立時，話到尾打正旗號幫人都要諗番句口號，叫做有個方向，多謝林先生，佢贈咗句「生命因你變得好」畀我哋，意思直截了當，社會上貧苦大眾，因為各位讀者嘅捐款捐物支持，令到生活得到改善，生命活出尊嚴。
多少個愛心大使追日趕月風塵僕僕嘅日子，我哋帶住呢個使命去探訪、送支票、送電飯煲、送口罩、送尿片、送奶粉……送上聲聲問候和關懷，為一張張乾枯嘅臉塗上隱形嘅潤膚膏；還有做服務時掛着基金口號嘅一幅幅banner、一個個backdrop，都刻有清楚嘅印記─「生命因你變得好」。
屈指一算，基金八年嚟幫過嘅個案數以萬計，殮葬援助、緊急生活、醫療、教育……瓣瓣有，條路向前行靠着只一個方向－「生命因你變得好」。
基金謹代表所有接受過幫助嘅社會貧黎，向林先生致敬。雖然你失去生命，但你已經賦予基金生命，吹了一口活氣，讓生生不息嘅薪火得以延續，照亮幽谷低處。
暖流熱線
電話:29908688
傳真:23702192
電郵:
網址：