精明消費：
《魔戒III》《少年阿虎》Figure玩具即日上映

每次有大卡士、大製作電影上畫，戲未上，Figure玩具晨咁早就有得賣，今期最強勁當然係《魔戒III》同《少年阿虎》，未上畫聲勢已席捲全城，電影精品同玩具，大人細路個個追捧，想知今期又有咩新貨上市？即刻帶你睇睇。

記者：黃婉冰　攝影：梁細權
模特兒：Duncan、進（DreamDestination）

佛羅多「刺針」
有聲有燈 $119（b）
主角佛羅多貼身武器，最強武器之一「刺針」，外形同真劍一樣，揮劍時劍尖會着燈，就好似感應到戒靈、半獸人時一樣，同時又有兩種格劍聲，夠晒逼真。

亞拉岡ActionFigure
造型威猛 $59.9（b）
身高6吋，第3集造型，身披黑袍凶神惡煞，手執「納希爾」，腰繫彎刀，手腳可隨意郁動。

半獸人「十字弓」
三箭在弦 $169（b）
半獸人武器「十字弓」，比例接近原著，三箭在弦，射程可達9米遠，用發泡膠做箭頭夠安全，小朋友玩互射，中箭都唔使驚會受傷。

忠奸白巫師ActionFigure $99.9（b）
一Set有齊甘道夫同撒魯門2個忠、奸白巫師，手腳可郁動，撒魯門重可以將「真知星球」吸起，附送《魔戒》頸鏈1條，抵玩。

索倫Figure雙眼發光 $169（b）
雖然唔係人人都鍾意大奸角索倫，但10吋高Figure外形實在威猛，一篤背脊暗掣會發聲，一雙眼核放紅光，咁吸引，話唔定你會愛上佢呢。

咕魯Figure忠奸兩個樣 $169（b）
咕魯有雙重性格，時忠時奸，連Figure都可以改頭換面，隨時換頭，表情一忠一奸，發出2種唔同叫聲，勁盞鬼。

擒高擒低咕魯ActionFigure $59.9（b）
6吋高，咕魯身手敏捷，關節位勁靈活，石牆後面有暗掣，向上向下推，咕魯就會跟住上下咁爬，玩樂無窮。










同場加映
限售1,000隻《少年阿虎》Figure
同期上畫嘅《少年阿虎》都推出6款角色Figure，其中3款跟足主角吳建豪戲入面3個唔同造型，戲服抄到足有9成似，但只限1,000套，𠵱家賣緊吳建豪Figure，其他角色到27號先有得賣。

大學生
$299（a）（b）
戲入面吳建豪飾演一個不羈大學生，大學校舍背景當然唔少得，拳套可以套入手，褲腳索繩都做得好Detail。

港青拳館
$299（a）（b）
港青拳館係佢第一間加入嘅拳館，運動衫有拳館徽章，打沙包個樣好鬼Man，離遠睇重有少少似李小龍。

大成拳館
$299（a）（b）
裝備比港青拳館少，只得1個木人樁，好彩套功夫衫都唔弱，擺多個打詠春姿勢，一樣咁有睇頭。

自己砌大擂台
$399（a）（b）
有拳手又點可以無擂台？60cm×60cm大擂台由鐵支架同厚膠板組合而成，唔難砌，幾分鐘就搞掂，擂台4個角有軟墊，同戲入面個擂台一模一樣。

阿Tank殺氣騰騰
$179（a）（b）
吳建豪喺搏擊大賽嘅對手就係阿Tank，睇佢表情就知唔係人咁品，殺氣騰騰，好入戲。

Figure手腳有紋身
各$179（a）（b）
飾演同館師兄弟嘅錢家樂同譚俊彥Figure，每個都有2款手俾你換，譚俊彥Figure同戲一樣手腳玩紋身，畫工精細。

3DMovement關節位
首創3DMovement關節位可以360度扭動。

錫製杯碟有睇頭
玩具唔啱玩？下面幾款錫製杯碟擺設可能合你心意，以倒模同人手打磨方法，做出立體效果，手工極精細，《三部曲》同《前傳》人物角色全部有齊，具收藏價值。

售賣點
（a）紅蜘蛛（23013838）地址：旺角兆萬商場地庫2樓
（b）各大玩具反斗城（查詢瑞華行：24331828）
（c）RoyalSelangor（27309555）地址：中環太子大廈2樓247號舖