區議會選舉，投票率創新高，7.1效應，餘威猶在，何秀蘭葉國謙血戰觀龍樓，慘遭土共抹黑蹂躪，話阿秀當選，會搞到西環全民皆雞，觀龍樓變咗鳳姐樓，結果係點，有眼睇。
到咗九點半，投票率已經高達百分之四十七點幾高過上屆，政制事務局林公公出嚟回應，話投票率有信心創新高，咁即是話係香港民主嘅發展。大法官光頭興亦不甘後人，話投票率高係同7.1遊行有關。光頭興真係識執生，當初將投票時間縮短至七點半嘅，又係佢，因為惹起公憤，嗱嗱聲轉軚，佢承認7.1遊行嘅效應，咁咪即是承認佢當初想約束7.1效應，同香港人為敵？
一場區議會競選，經已測試得出，無論高官、政客、邊啲係人，邊啲係鬼。雖然一啲傳媒，淪為抹黑嘅政治工具，但另外有一啲，例如無綫新聞部，就報道十分中肯，兼代表咗香港人嘅基本利益。
無論民主開明派同親中土共派，邊一派得票多，民主遊戲要講風度，喺呢個時候，暫時未到打落水狗嘅鐘點，但龐大嘅民主人口，顯示咗香港人強烈要求真正當家作主嘅人權呼聲。
大陸方面，由於極之重視7.1效應對於自己友民建聯嘅痛擊指數，有消息話北京最高當局已經成立心戰室，由曾慶紅親自部署，誓要幫民建聯力挽頹勢。但唔知曾副主見唔見到：街邊好多競選嘅標語，好多候選人其實係民建聯，但佢哋唔敢打出黨招牌亮相，只敢自稱「獨立」？
曾慶紅副主席，你老人家了解咁嘅真相嗎？會向江軍委主席澤民同志報告咁嘅實情嗎？
民主係世界潮流，無可抗拒。欽點、委任、派紫荊汽水蓋收買，全部係反動派嘅所為。土共今次就算大力抹黑何秀蘭、長毛、阮品強（阮品強最慘俾人屈完叫雞，再屈酒店床上大小便失禁，講到佢好似臨死之前嘅毛主席咁），但都算係參與咗現代社會嘅民主遊戲，若然係三十年前，早就青筋暴現凶神惡煞咁拉咗何秀蘭同長毛等去跪玻璃，今次有咁嘅表現，算係進化咗一大步咯。
區議會民主大熱身，只不過係打預備組，氣氛初初冷淡，後來轉旺，證明愈來愈多香港人覺得好唔妥，明年九月嘅立法會選舉，肯定會更加刺激，亦證明香港人玩民主，已經愈來愈成熟。
明年九月，立法會選舉時大家街頭再見，二○○七年，全港普選特首，亦係街頭見！
傳真︰2623-9278
電郵︰