長實賣樓特別多計，呢排當紅嘅鱷魚仔，就成為佢哋嘅宣傳工具，過去兩日喺長沙灣宇晴軒售樓處，大派鱷魚玩具畀睇樓客。蘭西噚日落去採訪，接待處嘅職員對於送鱷魚玩具一事表現毫不知情，蘭西覺得好奇怪，於是問售樓部嘅職員，點知佢話鱷魚玩具只係送畀買家，睇樓人士冇份，重話啲玩具得幾隻咋。
蘭西於是打電話畀長實高層，佢哋解釋話送玩具係道具部嘅同事負責，分時段抽獎送出，售樓部職員專責賣樓，可能唔係咁清楚，重話全日送出過百隻，至於買家就可以攞齊全套鱷魚家族。
蘭西覺得既然送玩具係賣樓噱頭，又喺售樓處現場抽獎，售樓部職員成日在場無理由乜都唔知，須知道睇樓客就係潛在嘅買家，呢個道理都唔明，又點稱得上專責賣樓呢？
紅磡漁人碼頭商場辦韓國節，身為主人家嘅長實趙國雄，噚日出席開幕儀式嘅同時，重買番啲韓國食品「應節」。現場有唔同嘅韓國產品攤檔，有食品同電器等，老趙就對即食麵情有獨鍾，一共掃咗40包共4款口味，重推介黃色包裝嘅即食麵畀記者，另外又買泡菜同蘿蔔，埋單500幾蚊。
老趙重話，以前喺外國讀書嘅時候，已經好鍾意食蘿蔔，一煲蘿蔔牛腩，可以食成個禮拜，𠵱家都一樣咁鍾意。
地產代理監管局最近將「新里程」刊物，改名為「專業天地」，內容多樣化咗。其中「鑑惕篇」一欄，講述有代理停牌期間照常營業而再遭處分。
話說某間代理公司嘅董事，因所屬公司喺一宗研訊中，觸犯「地產代理條例」，公司同佢都要停牌一個月。點知地監局職員喺巡查中發現佢喺停牌期間，繼續營業，於是將案件轉介畀警方，告佢無牌經營，名董事承認控罪，被罰二千蚊。地監局最後判佢停牌多一個月，重講明假如再犯就一定加重刑罰。
噚日嘅「1123」區議會選舉經已塵埃落定，呢日有多個大型且全新樓盤開賣，好似將軍澳蔚藍灣畔、土瓜灣傲雲峰、元朗四季雅苑等，喺呢個搵錢大好時機，大部份地產經紀都無法履行公民責任，到投票站投下神聖一票。蘭西下晝5點幾打畀班代理，十居其九都話未投票，自認政治冷感，部份更加話，重未登記做選民。有啲就話放咗工先啦，個個都顧住搵客，個別直頭唔記得噚日係區議會選舉日㖭，最離譜嘅係有個代理竟然投訴啲候選區議員，同佢哋喺同一條街上拉票，阻住佢哋做生意。
中港測量師行資格互認，令到兩地人才可以交流，中原測量師行董事總經理黎堅輝話，佢哋喺內地成立嘅公司，會加強估價業務比重，原因係內地紛紛改以招標或拍賣方式將土地推出市場，所以對估價師嘅需求一定會大增。
佢講，內地估價師有數據，但客戶嘅信心就差啲啲，本港測量師行就素質夠，可惜缺乏數據做估值參考，𠵱家可以互相交流人才，應該可以解決到呢個問題。
蘭西
電郵地址：
