除咗港股上周五出奇穩定之外，上周五晚歐美股市亦都冇乜事。上周五滙豐只跌0.5元，有啲啟示。尾市114.50元買盤634個，114元買盤1100個，再低一兩格，每格都有幾百個買盤，而賣盤較少，但股數則唔係，成個散戶鬥大戶格局，以前咁嘅場面出現唔少，最終滙豐都係升咗上去。
恐怖分子威脅炸呢度炸嗰度嘅新聞，陸續出現。睇多幾日，如果全球股市都乜事，則個市或已習慣壞消息影響，有免疫力，可以比較放心落注。
近期大藍籌中，電盈（008）係最弱者之一，上月見6.05之後，近日5元都守唔住，收4.875元，9RSI連20都跌破，話唔埋會因超賣而反彈。電盈Call輪9875短期或有技術性反彈，但去到尾風險亦唔細，因為下月底就到期，溢價21.3%，槓桿率139倍，1個月內要正股起番1元以上，唔多實際。博電盈反彈買Call輪，9791比較實際。
章 盛