曾經因為藥物而出事嘅男歌手真係無藥可救，之前佢已經搞到差啲要喺呢個圈消失，到最近先至有番啲工作。以為佢經歷咗咁多嘢，會生生性性做嘢，點知佢又故態復萌，久休一輪出返嚟蒲不特止，重愈玩愈過份。
早排男歌手同朋友落中環Dragoni玩，佢坐咗喺一個角落，但唔夠一陣又不甘寂寞，竟然周圍問人攞草食，後來有人畀咗兩支手捲草佢，佢竟然當眾就吸起大麻上嚟，吸毒吸到佢咁揚都算過份喇！
佢啲朋友忍唔住同男歌手講：「你有冇揚啲呀！你話晒係公眾人物，衰咗一次重唔夠呀！」點知男歌手重理直氣壯話：「怕乜嘢呀！我唔食人哋都當我食㗎啦！」男歌手呢啲咁唔自愛嘅表現，真係枉費佢經理人重咁搏命去幫佢呀！
郭晉安啱啱贏咗TVB個「男主角」獎，佢噚日同老婆仔宣萱分別接受港台訪問。《戇夫成龍》令阿旺大紅大紫，但佢一直都冇驕傲，呢種唔忘本嘅態度原來係喺周潤發身上學番嚟嘅，佢噚日喺節目中話：「記得喺我初出道時，都冇乜人識，但係佢都有拍拍我，叫我努力，呢句說話影響我好大。」
趙頌茹（阿Yu）噚日喺青衣城出席新城活動，佢同記者報料話小腿受傷，重特登拉高條褲向大家展示佢嘅傷勢。阿Yu話：「我噚晚見個朋友飲醉酒，咪諗住去扶佢，點知唔小心撞損咗隻腳，𠵱家都好痛。」馮仁昭覺得阿Yu着晒長褲，佢唔係自己爆響口都唔會知佢受傷，咁識小題大做，足見阿Yu都好識爭取見報機會喎！
2R噚日喺葵芳新都會廣場舉行「2RNewayTwoFresh寫真集簽名會」，妹妹Race話希望可以喺迪士尼樂園舉行婚禮，佢重話：「我已經計劃好用四年時間去搵男朋友，咁拍三、四年拖之後就結婚，其實我細細個已經成日諗結婚嘅嘢，不過我𠵱家都冇男朋友。」搵男友都要用四年，睇嚟可以試拍好多次拖喎！
Cookies噚日去沙田出席樂善堂活動，但成員之一嘅Theresa因為扁桃腺發炎要留喺屋企休息，連商台稍後嘅歌舞劇都演出唔到，要搵個排舞師頂替；唔知係咪病開有條路，早前Kary返內地工作，因為啲路凹凸不平，坐車時整親條頸，到𠵱家重未有時間睇醫生，睇嚟佢哋都要注重身體，唔係得番啲餅碎出嚟就唔係幾好啦。
陳鍵鋒噚日喺銅鑼灣出席健康產品宣傳，佢同吳啟華都係呢個產品嘅代言人。陳鍵鋒噚日以飛機師造型出現，佢重即場表演吹笛同包禮物。問到佢有冇吹過笛畀緋聞女友胡杏兒聽，佢話：「佢住喺我樓上，唔知聽唔聽到。」馮仁昭覺得如果陳鍵鋒真係咁浪漫吹笛畀胡杏兒聽，只怕佢未打動到對方，就俾鄰居投訴噪音騷擾啫。
田啟仁（田雞）噚日同四師弟陳國坤去中環參加萬人偶像李小龍六十三歲冥壽活動，田雞啱啱由上海返嚟香港，佢話星爺套《功夫》已經拍晒，啱啱將啲片運返香港準備剪片，而稍後佢會監製一套古裝片，套戲重會由近日成為笑匠嘅鄭中基主演㖭。咦！咁會唔會掉番轉頭撼星爺㗎！
