如果大家有留意車壇動態的話，相信都會知道寶馬車廠將推出走SAV路線嘅X3車系，但大家咪以為廠方會忽略其老大哥X5噃！原來廠方早有準備，快將為X5推出Facelifted新版，雖然變動集中響外觀及性能表現上，但仍無損其一份剛強個性。
先從外觀而言，雖然驟眼望落去Facelifted新車嘅造型，與現有型號十分相近，但當細心留意下，不難察覺新車嘅車首設計，來得更見突出吸引，當中一組頭燈、鬼面罩及頭泵把皆屬全新配搭，望落好有一份吸引性；車廂內部亦略有改動，設備變得更齊全之餘，闊落車廂空間及承托力高嘅座椅，更能給予你有更佳乘坐享受。
然而，相信變動最大嘅地方，會係新車嘅引擎配搭，其中3.0i型號由0至100公里嘅加速度，由原來嘅8.5秒變成8.3秒；至於4.4i型號嘅一台V8偈，馬力輸出由原來嘅286匹增至320匹，0至100公里加速度，更只需7.0秒咋！除此之外，廠方更為新車加有全新xDrive四驅系統，同埋多套經改良嘅電子系統，如DSC、TSC及HDC等等，從而令行車循迹及安全性增添不少分數。有興趣嘅車迷，不妨拭目以待喇！