新車速報：
保時捷911TurboCabriolet極速開篷樂

向以製造跑車而聞名嘅保時捷汽車，旗下一款走高性能路線嘅911Turbo型號最為車迷受落；而廠方為滿足不同車迷口味，更為其推出Cabriolet開篷版。然而，代理日前就引入咗新版911TurboCabriolet抵港，試問作為保時捷Fans嘅你，又點可以錯過今日嘅介紹呢！

記者：何永仁　攝影：陳偉強
ImageGirl：Kendy（CoolFactory）　
車輛提供：保時捷中心（29262911）

新車售價：
$1,920,000（6前速手波版）
$1,960,000（Tiptronic版）

保時捷911TurboCabriolet，一直係全球車迷嘅DreamCar之一，因其賣相極具吸引力之餘，驚人嘅強悍性能表現，全都叫人印象難忘；今回新抵港嘅911TurboCabriolet，不但擁有以上優點，另備有6前速手波及5前速TiptronicS半自動波供選擇，以切合不同車迷口味。

狠辣造型盡顯魅力
如果大家重有印象的話，都應該記得保時捷911Turbo嗰個極富高性能跑車韻味嘅造型，而份屬姊妹嘅911TurboCabriolet亦與之相近，但就改用上開關只需20秒嘅電動軟篷作篷頂，另外重有四輪18吋巨型跑車合金胎軨作配襯，從而顯現出一份高性能開篷跑車嘅誘人魅力；值得一提嘅係，四輪18吋胎軨內嘅紅色制動卡鉗，奪目耀眼之餘，配合大口徑透氣煞車碟，制動表現亦見不俗呢！

車廂布局跑意盎然
打開車門所見，新車車廂布局來得甚具跑味之餘，以紅色作主調嘅色調配襯亦見鮮豔奪目；前後兩排座椅皆以高級真皮鑲嵌而成，兼且承托力十足，乘坐倍見貼服舒適，而前座更備有全方位電控調校，駕駛席另備有記憶功能㖭！設備配搭亦見齊全，除電窗、無線電話及原廠恒溫冷氣外，另備有BOSE高級音響，同埋中控台多功能顯示屏幕及行車電腦，當然唔少得重有前座雙安全氣袋、側氣袋，同埋於翻車意外時自動彈出嘅防滾架，以確保乘客安全啦！

輸出強悍操控性強
新抵港嘅保時捷911TurboCabriolet與硬頂版一樣，同樣以一台3.6公升水平對向六汽缸引擎作核心，並輔有TwinTurbo裝置及VarioCamPlus技術，動力輸出數值強悍有勁，無論配以6前速手波或5前速TiptronicS半自動波，起步加速反應同樣凌厲有勁；而其中嘅VarioCamPlus技術，亦能夠有效控制車子嘅耗油量及廢氣排放量㖭！然而，新車更用上由前輪麥花臣支柱，以及後輪多連桿組成嘅跑車懸掛組合，不但能令離地距較911Carrera型號低10mm外，響恒式四驅、四輪18吋高性能輪胎，以及多套電子系統（如ASR、PSM等等）嘅輔助下，操控表現絕不遜色，走彎時亦見有頗佳循迹性㗎！

記者評語：
盡享開篷駕駛樂
早前曾試駕駛過硬頂版嘅保時捷911Turbo，一台3.6公升水平對向六汽缸TwinTurbo偈，其表現已教人一試難忘；今回改以開篷跑車形象示人，更可讓你感受到真正在公路上高速馳騁，以及開篷跑車帶畀你嗰份舒暢感呢！

Kendy評語
外形誘人富跑格
呢部全新保時捷911TurboCabriolet跑車嘅外形，不但秉承原有911Turbo硬頂版嘅高性能跑車個性外，用上開篷設計後變得更見突出，加上四輪18吋跑車合金胎軨及紅色制動卡鉗嘅襯托下，一份叫人難以抗拒嘅誘人魅力油然而生。